شرح كامل عن الرخصة الدولية لقيادة الحاسب الالي

سلام عليكم    للفائدة حابي اتكلم عن شهاده مهمه  جدا للكل وبتزيد من فرص قبولك في الوظائف
 شهادة ال ICDL الرخصة الدولية لقيادة الحاسب الالي
ولأنه شفت كم شخص بستفسر عنها  فحبيت ألخصها ليكم في فتيل😂
بحكم. عملي في  إدارتها في السودان

ICDL
International Computer Driving License
الرخصة الدولية لقيادة الحاسب الالي
هي شهاده عالمية تثبت انو حاملها عنده ادراك كامل لمهارت استخدام الحاسوب وتطبيقاته المختلفه .

بدت من 1996 وكان اسمها الرخصة الاوربية لقيادة الحاسوب
‏ECDL وبعد نجاحها في أوروبا انتشرت في باقي الدول وأصبحت الرخصة الدولية..و رئاسة البرنامج بمؤسسة ECDL Foundation في ايرلندا..

طيب الشهاده دي منو بيحتاجها ؟؟؟
اي شخص في اي مجال تعتبر الشهاده دي أضافه مهمه لانه زي ما عارفين الحاسوب بدخل في كل المجالات ..ومعرفه الحاسوب ومهاراته اصبحت متطلب حياة مش رفاهية ساي😉

وللعلم الحصول على شهاده الICDL بقى واحد من الشروط الاساسية للتوظيف في دول كتيره جدا عربيه وغيرها.  وحتى اذا ما شرط توظيف اكيد بتكون شي مميز في سيرتك الذاتيه😉

مقرر الICDL يتكون من مجموعه كبيره من الوحدات بصنفها في الآتي:

الوحدات الاساسية :
١- أساسيات الحاسوب
٢- أساسيات الانترنت
٣- معالجة النصوص ( التعامل مع برنامج Microsoft Word)
٤- الجداول الالكترونية(التعامل مع برنامج Microsoft Excel

الوحدات القياسية :
هي كثيره بس حنذكر منهم  ٣ اللي هم؛
٥- العروض التقديميه(التعامل مع برنامج Microsoft PowerPoint )
٦-قواعد البيانات (التعامل مع برنامج Microsoft Access)
٧- التعاون عبر الانترنت ( التعرف على أدوات وطرق التواصل عبر الانترنت مثل مواقع التواصل الإجتماعي – مواقع عمل الاجتماعات اون لاين- والتعامل عبر البريد الالكتروني ..الخ).

الوحدات المتقدمه :
-معالجة النصوص المتقدمه
-العروض التقديميه المتقدمه
-الجداول الالكترونية المتقدمه
-قواعد البينات المتقدمه

للحصول على شهادة ال ICDL يشترط عليك النجاح في عدد من الامتحانات بحسب نوع الشهاده الانت عاوزها (طبعا في ناس كتيره ما عارفه انو في كذا نوع لشهادة الICDL😉)

هنالك اربعه انواع لشهادة الICDL :

اولا : الشهاده الأساسيه :
 ودي عشان تحصل عليها يفترض تنجح في امتحانات الاربعه وحدات الأساسيه اللي هي اول اربعه وحدات تم ذكرها اعلاه.

ثانيا : الشهاده القياسية :
(ودي هي الشائعة اكتر  واللي يمتحنوها اغلب الناس حاليا لتغطيتها قدر أكبر من المهارات وانصح بيها😉 )
و بتحصل عليها بعد نجاحك في امتحانات ٧ وحدات .. الاربعه الأساسيه + اي تلاته وحدات من الوحدات  القياسية.(فوق ذكرت ليكم ٣ وحدات قياسيه فقط لانه دي هي البختاروها ليك هم وبتجي كتبها في تغليف واحد مع بعض بس ما شرط هم ممكن تختار اي ٣ اخرى وحا اذكر  ليكم في منشور تاني بقية الوحدات)

ثالثا : الشهادة المتقدمه:
ودي عشان تحصل عليها
-لازم تكون حصلت على الشهاده القياسيه.
-لازم تنجح في ٣ امتحانات من امتحانات الوحدات المتقدمه .

رابعا : شهادة البروفايل :
ودي بتختار انت عدد من الوحدات وتاخذ بيهم شهادة
(مثلا بكون انا حسب حوجتي واختصاصي في وحدات ما محتاج ليها او المؤسسه الانا فيها بتهمها وحدات محدده ف بختار الوحدات العايزها وياخذ بيها شهاده هي فقط)

طَيب دي كدا الICDL  بشكل عام وبمفهومها الأساسي ا… بس اكيد كل شي بتطور وبتضاف ليه الجديد ..

طيب عشان احصل على الICDL  المطلوب شنو؟
اولا :
شوف اقرب معهد ليك وسجل للكورس . وما شرط تدرس كورس (زي ما ناس كتار فاهمين كدا) اذا حاسي نفسك كويس ممكن تشتري الكتب وتدرس براك في البيت او اونلاين😉
الكورس مدته من شهر لي شهر ونصف حسب المعهد.
ثانيا :
بعد حسّيت نفسك جاهز للامتحانات .. تمشي  احد المراكز المعتمده وتسجل .عشان تحصل على بطاقة المهارات اللي  هو رقم الجلوس الخاص بيك للجلوس الامتحانات .(دا رقم عالمي خاص بيك فقط )

ثالثا :
تبدأ الجلوس الامتحانات ..
الامتحانات ما مربوطه بي زمن محدد ..يعني وقت ما كنت جاهز لامتحان وحده معينه من الوحدات تمشي المركز  تدفع رسومك وبوروك يوم الامتحان تجي تمتحن (كل مركز عنده ايام محدده للجلسات)
متى ما اكملت ال٧ وحدات (بغض النظر إكملتهم في اسبوع ولا شهر ولا شهووور )تلقائيا النظام عندنا بطلب ليك شهاده وبتتم طباعة الشهاده بواسطة ادارة الICDl الفرعية في الاْردن  وإرسالها لمكتب السودان والذي بدوره يسلمها للمراكز . وعادة تصل الشهادات في اول كل شهر.
(الخلاصه المده البتاخدها معاك الامتحانات بتعتمد على جاهزيتك انت)

طَيب الامتحانات حا اذكر ليكم نوعين :
الامتحان الحقيقي
ودا الامتحان الأساسي  اللي انت بتجلسه للحصول ع الشهاده
مدة الامتحان : ٤٥ دقيقه
عدد الاسئله :٣٦ سؤال

(أسئلة متنوعه  منها نظري ومنها عملي)

الامتحان التشخيصي (التجريبي )
دا امتحان تجريبي بنفس طريقة الحقيقي بس عدد أسئلة اكتر وزمن مفتوح بتنزله عشان تجرب نفسك وانا انصحكم بيهو لانه كتير من الاسئلة في التجريبي تلقاها في الحقيقي🙈

(متوفر الامتحان باللغة العربية والإنجليزية)

بقية الوحدات القياسيه :
– امن المعلومات
– تخطيط المشاريع(Project Planning )
– تحرير الصور
– تحرير الويب
– التسويق الرقمي (Digital Marketing)
– تحيليل البيانات Data Analysis
يعني الان الICDL مش فقط نصوص وطباعه 😉
……………….
المنهج الحالي للICDl يعمل ب Windows 8 وبرنامج Microsoft office 2013  . وكل كم سنه بيتم تطوير المنهج لمواكبة التحديثات في البرامج.
………………..
الكتب الرسميه متوفرة بنسخ ورقيه فقط وبتلقوها في المراكز المعتمده ومرفق ليكم قائمه بيها.. وإذا حابي تقرا من النت بتلقي محتوى شبيه وممكن تقرا منه.
………………
حاجه مهمة انتبهت ليها من تعليقاتكم .. اللي هي صلاحية الشهاده:
يا جماعه شهادةالICDL ما عندها مدة صلاحية يعني ما بتحتاج تجددها كل فتره.. الا اذا عايز تضيف وحدات جديده انت ما. امتحنتها.
……………
المراكز المعتمده :
عندنا مجموعه من المراكز المعتمده في الخرطوم وبعض الولايات
المركز المعتمد فقط هو العنده ترخيص لعمل الامتحان  وبدوره بيسلمك الشهاده عند إكمال الامتحانات .
الناس ما تلخبط لانه في معاهد يقولوا ليك شهادة وتوثق في الخارجية  .. دي مقصود بيها شهادة حضور الكورس  ما شهادة الICDL  . لانه الشهاده العالميه لا تحتاج لتوثيق الخارجية😉
……………..
واخيرا بكدا يكون كل ما يخص الICDL  عسى اكون كفيت ووفيت.
 ولمزيد من التفاصيل والاستفسارات  ممكن تتابعوا الصفحة الرسمية للICDL. (اسمها ICD Sudan للتأكيد بتلقوا فيها 5420 متابع)دي هي صفحتنا الرسميه ومسؤولين عن كل شي فيها بتلقوا فيها اسماء المراكز الجديده اللي بتعتمد وكل شي .. راسلوا الصفحه باستفساراتكم 😂

بالتوفيق للجميع وما تنسونا من صالح الدعاء
وبتلقوني انشاءلله في مراقبة  الامتحانات 😉😉✌️✌️
وشكرا

سعيد الطيب محمد الحسن
مسؤول المراكز – ادارة الICDL – Sudan
ضابط جوده (مراقبة الامتحانات )
منقول